Vinnuslys

Samkvæmt kjarasamningum ber vinnuveitanda að slysatryggja starfsmenn sína vegna vinnuslysa. Starfsmenn eru einnig tryggðir af vinnuveitanda á leið sinni til eða frá vinnu.
Tildrög vinnuslyss hefur ekki áhrif á rétt starfsmanns til bóta úr slysatryggingu launþega.

Jafnframt getur vinnuveitandi borið skaðabótaábyrgð á afleiðingum vinnuslyss ef slys má rekja til saknæmrar eða ólögmætrar háttsemi vinnuveitanda eða starfsmanna á hans vegum, s.s. ef annar starfsmaður vinnuveitanda veldur slysinu, ef öryggisbúnaði er ábótavant o.s.frv.

Dæmi um vinnuslys eru hálkuslys á beinni leið til eða frá vinnu, slys við ýmis tækjabúnað á vinnustað, fall í stiga o.s.frv.

Útreikningur bóta vegna vinnuslyss - slysatryggingu launþega

Afleiðingar vinnuslysa eru metnar með matsgerð matsmanns. Þegar matsgerðin liggur fyrir er hún send til tryggingafélagsins og óskað eftir uppgjöri. Uppgjör bóta byggir annars vegar á niðurstöðum matsgerðarinnar og hins vegar á þeim kjarasamningi sem tjónþoli tilheyrði á slysdegi.

Í kjarasamningnum er tilgreind grunnvátryggingafjárhæð sem fylgir vísitölu. Við uppgjör bóta skal því framreikna fjárhæðir kjarasamningsins í samræmi við þær breytingar sem orðið hafa á vísitölu fram að uppgjörsmánuði.

Bótaupphæð ræðst síðan af niðurstöðu matsins og uppreiknaðri grunnvátryggingafjárhæð. Til dæmis, ef afleiðingar slyss eru metnar til 10 stiga miska, nema bætur 10% af framreiknaðri grunnvátryggingafjárhæð samkvæmt kjarasamningnum.

Útreikningur bóta vegna vinnuslyss – ábyrgðartrygging

Ef vinnuslys er jafnframt bótaskylt úr svokallaðri ábyrgðartryggingu — það er þegar vinnuveitandi ber ábyrgð á slysinu vegna saknæmrar eða ólögmætrar háttsemi hans sjálfs eða starfsmanna hans — fer uppgjör bóta samkvæmt skaðabótalögum. Við slíkt uppgjör er stuðst við matsgerð og önnur fyrirliggjandi gögn um afleiðingar slyssins.

Í þessu mati er jafnframt metið hvernig afleiðingar slyssins hafa áhrif á framtíðartekjuöflun og vinnugetu tjónþola. Bætur vegna varanlegrar örorku eru eingöngu greiddar úr ábyrgðartryggingu vinnuveitanda, þar sem slíkar bætur falla ekki undir slysatryggingu launþega.