Hver á rétt á bótum eftir umferðarslys?

• Ökumaður

• Farþegi

• Gangandi vegfarandi

• Hjólandi einstaklingur

Þá er vert að minnast á það að ef bíl er ekið á hjólandi eða gangandi vegfaranda er bótaréttur viðkomandi hinn sami og farþega í ökutæki sem verður fyrir slysi.

Varstu í órétti?

Það er útbreiddur misskilningur að ökumaður bifreiðar sem er í órétti eigi ekki rétt á bótum vegna líkamstjóns sem hann verður fyrir.

Hvers konar bætur er hægt að fá?

Uppgjör og upphæð bóta vegna bílslysa fer fram samkvæmt skaðabótalögum, matsgerð og öðrum gögnum. Fyrir hönd umbjóðenda okkar gerum við kröfu á tryggingafélagið um bætur þegar matsgerð liggur fyrir. Tryggingafélög taka sér yfirleitt nokkrar vikur í að svara kröfubréfum og afgreiða bótakröfur.

Bætur skiptast almennt í eftirfarandi flokka:

Bætur vegna tímabundins atvinnutjóns:

Bætur sem greiddar eru vegna tekjumissis á þeim tíma sem tjónþoli er óvinnufær í kjölfar slyssins. Miðað er við raunverulegt tekjutap á tímabilinu frá slysdegi þar til vinnufærni hefur náðst að nýju.

Þjáningabætur (tímabundið ófjárhagslegt tjón):

Þessar bætur eru greiddar vegna tímabundins ófjárhagslegs tjóns, svo sem sársauka, óþæginda og skerðingar á lífsgæðum á meðan á bata stendur. Hér er um að ræða bætur fyrir líkamlegar og/eða andlegar þjáningar sem tjónþoli verður fyrir strax í kjölfar slyssins og á meðan á meðferð stendur.

Miskabætur (varanlegur miski):

Mat á varanlegum miska er eingöngu læknisfræðilegt mat. Við matið er einkum stuðst við miskatöflu Örorkunefndar. Miskabætur eru greiddar vegna varanlegrar skerðingar á líkamlegri eða andlegri færni sem rekja má til slyssins, óháð áhrifum á tekjuöflun.

Bætur vegna varanlegrar örorku:

Þessar bætur eru greiddar vegna varanlegrar skerðingar á getu til að afla tekna. Við matið er litið til þess hvernig ætla má að starfshæfni og tekjuöflun tjónþola hefði þróast ef slysið hefði ekki átt sér stað, samanborið við hvernig hún er eftir slysið að teknu tilliti til varanlegs líkamstjóns og þeirra áhrifa sem það hefur á framtíðartekjur.

Af hverju Tort?

Við aðstoðum tjónþola á öllum stigum málsins, frá fyrstu tilkynningu slyss til endanlegs uppgjörs bóta. Markmið okkar er að tryggja að réttur þinn sé virtur og að þú fáir þær bætur sem þú átt rétt á samkvæmt lögum.

• Yfir 40 ára reynsla

• Sérhæfing í skaðabótamálum

• Þúsundir mála afgreidd

• Ókeypis fyrsta ráðgjöf

Ferli bótamáls vegna bílslyss

Bótamál vegna afleiðinga bílslyss tekur að jafnaði um tvö ár frá upphafi til loka.

1. Tilkynning um slysið

Fyrsta skrefið er að tilkynna slysið til þess tryggingafélags sem á í hlut.

Í framhaldinu öflum við nauðsynlegra gagna, meðal annars samskiptaseðils frá:

• Heilsugæslu

• Sjúkrahúsi

• Landspítala

• Læknavakt

Þessi gögn varða fyrstu komu til læknis eftir slysið.

2. Ákvörðun um bótaskyldu

Þegar gögn hafa verið afhent tekur tryggingafélagið afstöðu til þess hvort bótaskylda sé fyrir hendi.

Aðeins eftir að bótaskylda hefur verið viðurkennd er almennt unnt að fá endurgreiddan útlagðan kostnað, svo sem vegna:

• Læknisheimsókna

• Sjúkraþjálfunar

• Lyfseðilsskyldra lyfja

3. Bið eftir stöðugleikapunkti

Að jafnaði líða 10–12 mánuðir frá slysdegi áður en frekari gagnaöflun fer fram.

Á þeim tíma er yfirleitt talið að svokölluðum stöðugleikapunkti hafi verið náð og hægt sé að meta hvort slysið hafi haft varanlegar afleiðingar.

4. Lokavottorð og frekari gögn

Þá óskum við eftir lokavottorði frá heilsugæslu eða sérfræðilæknum.

Í vottorðinu koma meðal annars fram:

• Afleiðingar slyssins

• Veitt meðferð

• Batahorfur

• Upplýsingar um fyrra heilsufar sem kunna að hafa áhrif á matið

5. Matsferlið

Þegar nauðsynleg gögn liggja fyrir hefst matsferlið.

Við tökum saman gagnapakka fyrir matsmenn sem nýtist við mat á afleiðingum slyssins, sérstaklega varanlegum afleiðingum. Í bílslysum fer matið fram samkvæmt skaðabótalögum.

Matsferlið tekur almennt um sex mánuði.

Ferlið hefst með því að matsbeiðni er send tryggingafélaginu til staðfestingar. Matsmenn fara síðan yfir gögn málsins, framkvæma læknisskoðun og taka viðtal við tjónþola áður en þeir leggja mat á afleiðingar slyssins.

Niðurstaðan kemur fram í skriflegri matsgerð.

6. Krafa um bætur

Þegar matsgerð liggur fyrir gerum við formlega bótakröfu á hendur tryggingafélaginu á grundvelli niðurstöðu matsmanna.